“Jam kundër shkarkimit të Presidentit”, Dashamir Shehi: Krijohet precedent i rrezikshëm

Kreu i Partisë Lëvizja për Zhvillim Kombëtar (LZHK), Dashamir Shehi është shprehur kundër gjyqit në Gjykatën Kushtetuese për shkarkimin e Presidentit të Republikës Ilir Meta. Ai e cilësoi të gabuar politikisht vendimin e parlamentit për shkarkimin e tij, për të cilin Gjykata Kushtetuese duhet të vendosë nëse është Kushtetues apo jo.

Dashamir Shehi deklaroi në “Frontline” në News24 se krijohet një precedent i rrezikshëm dhe se jep një sinjal të keq si te qytetarët ashtu dhe te ndërkombëtarët.

“Jam që në princip kundër gjyqit. Gjykata Kushtetuese nuk është se bën ndonjë vendim vetë, Gjykata Kushtetuese ka për detyrë të vendosë nëse vendimi i parlamentit është kushtetues apo jo. Për mua vendimi i parlamentit është një vendim i gabuar politikisht. Presidenti duhet lënë në punën e vetë.

Në qoftë se ne do të shkelim kompetencat e njeri-tjetrit, institucionet nuk do ta bëjë më që të jetë i pavarur, të paktën formalisht. Atëherë ka rënë institucioni i Presidentit dhe gjithë këtë shtet e drejton partia e Edi Ramës. Kemi kaluar kompetencat e kryeministrit, është bërë kancelar ky zotëria.

Unë them që zoti President, ai që është duhet të rrijë atje deri në përfundim të mandatit. Unë nuk mbroj Ilir Metën, mbroj institucionin.
Krijohet një precedent shumë i rrezikshëm në shtetin shqiptar që partia në pushtet e rrëzoka kur iu tekërka presidentin. Kjo tregon që në rrethana të caktuara maxhoranca mund të bëjë çfarë të dojë. Ndaj unë them mos ta krijojmë këtë precedent. Është e rrezikshme.
Do japë dhe një sinjal të keq. Çfarë logjike ka ta heqësh presidentin kur për 3 muaj i mbaron mandati, aq më tepër që në 3 muaj e fundit i hiqen dhe disa kompetenca. Koha fizike po i mbaron. Koha institucionale zvogëlohet. Për çfarë po bëhet gjithë ky gjest i madh, për t’i thënë shqiptarëve që bëjmë çfarë të kemi qejf nuk na ndalon kush. Edhe në sytë e ndërkombëtarëve. Gjykoj që është e gabuar politikisht për Shqipërinë. Kam gjykuar që ka qenë e gabuar marrëveshja mes Ramës dhe Berishës për të reduktuar kompetencat presidenciale. Gjatë kësaj rruge ka pasur goditje ndaj presidentëve, shpeshherë të palogjikshme që e kanë dëmtuar institucionin”, tha Shehi.

Ai theksoi më tej se nuk mbron Ilir Metën, por institucionin.

“Presidenti në letër supozohet që është mbi palët. Mundet që z. Meta ta ketë shkelur këtë, por unë nuk e quaj të mjaftueshme për të bërë këtë kapërcim kaq të madh. Qëkur është bërë ligji për Presidencën është bërë gabim se presidentin e zgjedh me 71 vota. PS zgjedh kë mund të ketë qejf dhe Presidenti është ushtar partie. E dëgjuat si tha Rama, mund ta marrim dhe nga jashtë, si me qenë lojtar futbolli. Kjo tregon se deri sa poshtë e kanë zbritur rolin presidencial.

Gjykoj të mos e ngacmojmë Presidentin. Nuk mbroj Ilir Metën, mbroj institucionin e shtetit sepse shteti shqiptar po degjeneron, po thërrmohet dhe në sy të botës. Ne presim negociatat, kur vjen puna ne jemi një shtet që as nga ana formale nuk qëndrojmë më”, tha Shehi.

GAZETA.MK

Story i mëparshëm

Prishtina përforcohet edhe me dy lojtarë të tjerë

Story i radhës

Tetova me 128 magjistër shkencash të papunë

Të fundit nga

AlbanianMacedonianEnglish