Agjencia Kombëtare e Inteligjencës e Türkiyes (MIT) “neutralizoi” një terrorist të lartë të PKK/YPG-së në një operacion ndërkufitar në veri të Sirisë, thanë burime të sigurisë, transmeton Anadolu.
Inteligjenca turke shënjestroi terroristin Muhtesim Akyürek, me emrin e koduar Serhat Serhildan, në një operacion në rajonin Amude, thanë burimet në kushte anonimiteti.
Agjencia e inteligjencës ka ndjekur nga afër terroristin, i cili ishte përgjegjës për aktivitetet stërvitore në rajon.
Akyürek, i cili iu bashkua strukturës rurale të grupit terrorist në vitin 2015, mori trajnim ideologjik dhe të armatosur.
Autoritetet turke përdorin termin “neutralizim” për të nënkuptuar se terroristët në fjalë janë dorëzuar, vrarë ose kapur.
Në fushatën e saj terroriste më shumë se 35-vjeçare kundër Türkiyes, PKK-ja – e listuar si organizatë terroriste nga Türkiye, SHBA-ja dhe BE-ja – ka qenë përgjegjëse për vdekjen e mbi 40.000 njerëzve, duke përfshirë gra, fëmijë dhe foshnja. YPG-ja është dega e saj siriane.
