Një sintetizues i të folurit në gjuhën bullgare është zhvilluar për përdorim nga njerëzit me dëmtime në shikim, tha të premten kryetari i Unionit të të Verbërve në Bullgari, Vasil Dolapçiev, duke folur në një konferencë shtypi të organizuar nga BTA, ku u prezantua softueri, Dolapçiev e përshkroi këtë si “një ngjarje të paharrueshme për bullgarët me shikim të dëmtuar” pasi sipas tij, kjo pajisje do të japë mundësi të reja për integrimin social të këtyre personave.
Produkti softuerik u zhvillua nga Instituti i Teknologjive të Informacionit dhe Komunikimit me Akademinë Bullgare të Shkencave në një projekt të financuar nga Fondi i Mbrojtjes Sociale i Ministrisë së Punës dhe Politikës Sociale. Projekti kushtoi 384,000 leva, afër 20,000 leva u siguruan nga Unioni i të Verbërve, tha Dolapçiev.
Prof. Stoyan Mihov, një nga zhvilluesit e softuerit, tha se programi u krijua nga një ekip prej 14 studiuesish për 13 muaj. Ekipi krijoi një model unik të një rrjeti nervor i cili mund të vendosë automatikisht theksin e fjalëve për të siguruar të folur të sintetizuar natyrshëm në bullgarisht. Mihov tha se ekipi nuk përdori punimet e njerëzve të tjerë, gjë që e bën softuerin të veçantë. Para se të finalizohej, programi u testua tek personat me dëmtime shikimi të moshave të ndryshme, si meshkuj ashtu edhe femra, në mënyrë që të plotësohen nevojat e tyre në masën më të plotë, tha Mihov. Sintetizuesi i të folurit do të prezantohet në konferenca të ndryshme ndërkombëtare.
Dolapçiev tha se Unioni i të Verbërve do të marrë masa për t’i ofruar softuerin pa pagesë më shumë se 4,000 bullgarëve, duke përfshirë fëmijë, me më shumë se 50% dëmtim të shikimit.
Zëvendësministri i Punës dhe Politikës Sociale, Lazar Lazarov, i cili mori pjesë në konferencën për shtyp, tha se një nga projektet e para që do të zbatohet në kuadër të Planeve Kombëtare të Rimëkëmbjes dhe Qëndrueshmërisë është mbështetja dhe sigurimi i pajisjeve të teknologjisë së lartë për personat me aftësi të kufizuara. Projekti kap vlerën 24 milionë leva, nga i cili pritet të përfitojnë më shumë se 3,300 persona me aftësi të kufizuara në Bullgari, tha ai.
