Kryetari i Gjilanit, Alban Hyseni është zgjedhur kryesues i Bordit të Agjencisë për Zhvillim Rajonal Lindje.
Në një komunikatë për media bëhet e ditur se Hyseni u zgjodh kryesues i AZHR-Lindje me vota unanime në mbledhjen e rregullt të Bordit të agjencisë, të organizuar në bashkëpunim me Ministrinë e Zhvillimit Rajonal.
“Zotohem për thellimin e bashkëpunimit ndërkomunal, gjithmonë në të mirën e përbashkët të qytetarëve të komunave që përfaqësojmë. Bashkë, për zhvillimin rajonal!”, ka thënë kryetari Hyseni.
Bëhet e ditur se bordi, miratoi raportin e punës të agjencisë për vitin paraprak, dhe se konkludim i këtij takimi ishte se AZHR-Lindje është mekanizëm i cili ka impakt të drejtpërdrejt në bashkëpunimin ndërkomunal dhe në zhvillimin rajonal.
“Kryetarët e komunave u zotuan se do të jenë aktivë dhe mbështetës në kuadër të AZHR-Lindje, sepse kështu është një lidhje direkte mes orientimit të fondeve qeveritare por edhe bashkëpunimin me donatorë dhe investitorë të fondeve ndërkombëtare”, thuhet në komunikatë.
