Hungaria ka rikthyer kundërshtitë ndaj avancimit të Ukrainës në procesin e integrimit në Bashkimin Evropian, duke argumentuar se vendet e Ballkanit Perëndimor nuk duhet të anashkalohen pas vitesh pritjeje dhe reformash.
Edhe pse ndryshimi i pushtetit në Budapest krijoi pritshmëri se do të hiqej bllokada e vendosur më herët nga qeveria e Viktor Orbanit, autoritetet e reja hungareze kanë vijuar të kundërshtojnë një proces të përshpejtuar për Kievin.
Sipas raportimeve të Financial Times, Hungaria ka bllokuar hapjen e dy grupeve të tjera të kapitujve negociues për Ukrainën, që lidhen me tregun e përbashkët dhe politikat ekonomike e sociale.
Zëdhënësi i qeverisë hungareze deklaroi se Budapesti nuk mbështet një “rrugë të përshpejtuar” për Ukrainën drejt BE-së, duke theksuar se vendet e Ballkanit Perëndimor kanë përmbushur për vite me radhë kritere të rrepta për anëtarësim.
Edhe kryeministri hungarez Peter Magyar ka shprehur kundërshtim ndaj përparësisë së Ukrainës në procesin e zgjerimit të BE-së, ndërsa ende nuk ka zhvilluar takimin e paralajmëruar me presidentin ukrainas Volodymyr Zelensky.
Nga ana tjetër, Komisioni Evropian vlerëson se Ukraina ka përmbushur kushtet për hapjen e kapitujve negociues, ndërsa disa liderë evropianë kërkojnë që procesi të përshpejtohet dhe kapitujt e mbetur të hapen brenda këtij viti.
Debati për zgjerimin e BE-së vijon të përplasë dy qasje: mbështetësit e integrimit të shpejtë të Ukrainës pas luftës dhe vendet që kërkojnë që Ballkani Perëndimor të mos lihet pas dore në procesin e anëtarësimit.
Burimi: botasot.info
