Hoti: Serbia po pengon zbardhjen e fatit të të zhdukurve

Ministri në detyrë për Punë, Familje dhe Vlerat e Luftës Çlirimtare, Andin Hoti, ka reaguar pas arrestimit të një personi në Serbi, nën dyshimin se ka ndihmuar në zbulimin e një varreze masive në Kosovë.

Hoti ka thënë se ky veprim është “tentim-vrasje ndaj të vërtetës”.

“Arrestimi i një njeriu nën dyshimin se ka ndihmuar në zbulimin e një varreze masive në Kosovë është dëshmia më e qartë se Serbia nuk po lufton krimet e luftës, por po lufton të vërtetën”, ka shkruar Hoti.

Sipas tij, Serbia vazhdon të mbrojë kriminelët, të frikësojë dëshmitarët dhe të pengojë zbardhjen e fatit të personave të zhdukur.

“Çdo arrestim i tillë dërgon një mesazh të qartë: kush flet për varrezat masive, ndëshkohet”, ka deklaruar Hoti.

Ai ka thënë se kjo nuk është mungesë bashkëpunimi, por “sabotim i drejtpërdrejtë i procesit për zbardhjen e fatit të personave të zhdukur” dhe shkelje e frymës së Deklaratës për Personat e Zhdukur, të dakorduar në Bruksel.

Hoti ka kritikuar edhe Bashkimin Evropian për, siç ka thënë, “mosveprim”.

“Nuk mund të flitet për vlera evropiane, pajtim dhe dialog, ndërkohë që tolerohen veprime që frikësojnë dëshmitarët dhe mbrojnë fshehjen e krimeve të luftës”, ka shkruar ai.

Ai ka kërkuar drejtësi dhe presion ndaj Serbisë për familjet e mbi 1 mijë e 570 personave ende të zhdukur.

“Heshtja dhe toleranca ndaj kësaj sjelljeje nuk i afrojnë familjet me të vërtetën, i largojnë edhe më shumë prej saj”, ka përfunduar Hoti.