Kryetari i Partisë Demokratike të Kosovës, Bedri Hamza, ka reaguar për procesin gjyqësor ndaj ish-krerëve të UÇK-së në Hagë, duke theksuar se kanë mbetur edhe 30 ditë deri në datën 16 shtator, kur pritet të shpallet aktgjykimi.
Hamza ka deklaruar se kjo datë duhet të shënojë përfundimin e një periudhe gjashtëvjeçare të paraburgimit për Hashim Thaçin, Kadri Veselin, Jakup Krasniqin dhe Rexhep Selimin.
“Sot na ndajnë 30 ditë nga 16 shtatori, dita kur do të marrë fund procesi gjashtëvjeçar i padrejtë, që i ka mbajtur Hashim Thaçin, Kadri Veselin, Jakup Krasniqin dhe Rexhep Selimin të izoluar në Hagë”, ka shkruar Hamza.
Kreu i PDK-së ka përmendur kohën e gjatë që, sipas tij, ish-krerët e UÇK-së e kanë kaluar në paraburgim, larg familjeve dhe Kosovës.
“Gjashtë vite paraburgim. Gjashtë vite larg familjeve dhe Kosovës. Gjashtë vite përballje me paragjykime, tendenca, narrativa politike, shkelje të të drejtave dhe padrejtësi të shumta”, ka deklaruar ai.
Hamza ka bërë të ditur se qëndrimi i tij dhe i Partisë Demokratike të Kosovës lidhur me rastin mbetet i pandryshuar, duke kërkuar drejtësi dhe lirimin e katër ish-udhëheqësve të UÇK-së.
“Pritshmëritë dhe kërkesat tona janë të qarta: drejtësi dhe lirim”, ka thënë Hamza.
Ai ka vlerësuar se 16 shtatori duhet të shënojë mbylljen e këtij kapitulli dhe kthimin e Thaçit, Veselit, Krasniqit dhe Selimit në Kosovë.
“Pas gjashtë vitesh, 16 shtatori duhet të jetë dita kur mbyllet ky kapitull i dhimbshëm për lirinë, pavarësinë dhe shtetndërtimin tonë. Duhet të jetë dita kur katër ish-udhëheqësit e UÇK-së kthehen në shtëpi”, ka shkruar ai.
Në përmbyllje të reagimit, Hamza ka përsëritur pritjen për vendimin e gjykatës, duke e lidhur atë me kërkesën për drejtësi.
“Presim edhe 30 ditë. Presim drejtësi”, ka përfunduar Hamza.
Burimi: botasot.info
