Granit Xhaka e ka takuar ish-trajnerin e tij, Arsene Wenger.
Ishte pikërisht trajneri francez ai që e kishte transferuar futbollistin nga Kosova në Arsenal vite më parë.
E tash, legjenda e “Gunners” u rikthye në stadium për herë të parë pas disa vitesh dhe ndërkohë, Xhaka e shfrytëzoi rastin të takohej me të.
Përfaqësuesi zviceran i ka postuar disa fotografi, ku shihet duke biseduar dhe duke e përqafuar atë për të cilin thotë se ishte vendimtar në zgjedhjen e tij pasi vendosi të largohej nga Borussia Monchengladbachu.
“Një preson i jashtëzakonshëm, një menaxher brilant dhe një arsye e madhe se përse nënshkrova me këtë klub special. Absolutisht e desha dhe e shijova faktin se e takova këtë legjendë”, ka shkruar Xhaka në llogarinë e tij në rrjetin social, “Instagram”.
Wenger konsiderohet si trajneri më i madh në histori të “Topçinjve”, ndërsa Xhaka është duke e kaluar formën jetësore në “Emirates Stadium” nën drejtimin e trajnerit Mikel Arteta.
Arsenali synon ta fitojë titullin e kampionit në Premierligë pas një pritjeje jashtëzakonisht të gjatë.
