Aplikacioni Street View i Google do ti bashkohet varrezës së produkteve të kompanisë. Me dekompilimin e versionit më të fundit të aplikacionit për Android, 9to5Google gjeti njoftime të sinjalizonin mbylljen e aplikacionit.
Konkretisht mbështetja për Street View do të përfundojë më 21 Mars 2023. Një përfaqësues i kompanisë konfirmoi për The Verge se aplikacioni kishte arritur fundin e jetës.
Google njoftoi shkëputjen e Street View nga aplikacioni kryesor duke shërbyer si aplikacion më vete në 2015-ën. I disponueshëm në Android dhe iOS, përdoruesit mund të ngarkonin fotot e tyre sferike nga telefoni apo kamerat sferike.
Vitin e kaluar kompania prezantoi Photo Paths ku përdoruesit mund të kontribuojnë fotot 2D të rrugëve dhe vendndodhjeve të cilat nuk janë dokumentuar ende nga Street View.
Street View do të vijojë të mbetet një funksionalitet kyç i Google Maps dhe ju ende mund të eksploroni virtualisht vende që gjiganti i teknologjisë i ka dokumentuar.
Gjithashtu mund të vazhdoni të shtoni foto sferike në Maps dhe të publikoni video 360 gradëshe duke përdorur Street View Studio. /PCWorld Albanian
