Këshilli për vlerësimin e aktakuzës ka miratuar aktakuzën e ngritur nga Prokuroria Themelore Publike kundër të dyshuarit Vasil Jovanov për veprën penale “vepra të rënda kundër sigurisë së njerëzve dhe pasurisë në komunikacion”, lidhur me aksidentin e trafikut që ndodhi në janar të këtij viti në bulevardin “Aradhat Partizane” në Shkup, në të cilin humbi jetën Frosina Kulakova, njofton Gjykata Penale Themelore Shkup.
“Njoftojmë opinionin se Këshilli për vlerësimin e aktakuzës KA MIRATUAR aktakuzën e Prokurorisë Themelore Publike me nr. KO 271/25 të datës 27.03.2025 kundër të dyshuarit V.J. për veprën penale ‘Vepra të rënda kundër sigurisë së njerëzve dhe pasurisë në komunikacion’ sipas nenit 300 paragrafi 2 lidhur me nenin 297 paragrafi 1 të Kodit Penal, lidhur me aksidentin nga janari 2025 në bulevardin Partizanski Odredi në Shkup, në të cilin humbi jetën 22-vjeçarja F.K.”, thuhet në njoftimin e Gjykatës Penale.
Me aktakuzën e miratuar është formuar lënda penale me nr. K.780/25, e cila do t’i caktohet më tej një gjykatësi për gjykim sipas sistemit AKMIS. Kur të caktohet data për seancën kryesore, palët dhe opinioni publik do të njoftohen më tej.
Sipas aktakuzës, më 29 janar 2025, Vasil Jovanov, pa leje drejtimi dhe nën ndikimin e alkoolit, ka drejtuar automjetin me shpejtësi prej 91 km/h në bulevardin “Partizanski Odredi” në Shkup. Në një vijë kalimi për këmbësorë, në dritë të kuqe për automjetet, ka goditur Frosina Kulakova, e cila po kalonte në të gjelbër për këmbësorët. Si pasojë e goditjes së fortë, Frosina ka pësuar lëndime të rënda trupore dhe ka ndërruar jetë në vendngjarje.
Pas këtij rasti janë mbajtur disa protesta në Shkup dhe Negotinë.
Burimi: alfax.mk
