Për shkak të interesimit të madh të opinionit, Këshilli i Gjykatës së Apelit në Shkup njofton se aktgjykimi i shkallës së parë për ish-shefin e DSK-së, Sasho Mijallkov, është anuluar dhe është kthyer në rigjykim sepse, siç thonë nga atje ishte e pakuptueshme.
“Përkatësisht, duke respektuar detyrën zyrtare, këshilli i Gjykatës së Apelit në Shkup ka konstatuar se ekziston mospërputhje në mes aktgjykimit të shqiptuar dhe asaj që thuhet në kopjen e tij me shkrim, gjegjësisht në burimin e aktgjykimit nuk ka përshkrim të aktgjykimit, veprime të kundërligjshme për secilin nga të akuzuarit. Kjo është veçanërisht e vërtetë pasi aktgjykimi me shkrim duhet t’i përgjigjet plotësisht dënimit të shënuar në procesverbal dhe për këtë arsye shpallja e aktgjykimit duhet të jetë i qartë dhe i saktë, përkatësisht shpallja publike e aktgjykimit duhet të përmbajë të gjitha elementet e nevojshme nga neni 408 të Kodit Penal. Një shkelje e tillë thelbësore është e natyrës absolute dhe e bën vendimin të paqartë, të pakuptueshëm dhe të papërshtatshëm për shqyrtim të mëtejshëm”, thuhet në arsyetimin e Gjykatës së Apelit.
Gjykata e Apelit në Shkup thotë se faktet që gjykata e shkallës së parë i ka marrë të vërtetuara në lidhje me veprimet e të akuzuarve, nuk përputhen me provat e paraqitura në shqyrtimin kryesor para gjykatës së shkallës së parë, në lidhje me konstatimet dhe mendimi i ekspertëve të Prokurorit Publik dhe të mbrojtjes, si në aspektin e veprimeve lidhur me përgjimet e komunikimeve, ashtu edhe në lidhje me vlerën e pajisjeve të shkatërruara.
“Gjykata edhe pse sipas detyrës zyrtare i kushton rëndësi parashkrimit të ndjekjes penale, duke marrë parasysh arsyet për të cilat është marrë vendimi, nuk ka marrë vendim meritor lidhur me parashkrimin e disa veprave penale, të cilat nuk paraqiten realisht para kësaj gjykate. Përveç kësaj, këshilli ka konstatuar edhe shkelje të tjera procedurale, për të cilat kjo gjykatë me aktvendim me shkrim do t’i sqarojë të gjitha arsyet, me udhëzime përkatëse gjykatës së shkallës së parë”, thuhet në njoftimin e Gjykatës së Shkupit.
