Videot e publikuara nga qytetarë të papërgjegjshëm të cilët hedhin mbeturinat në vende publike dhe në lumenj, u bënë temë aktualë ditëve të fundit.
Reagimet ndaj pamjeve të një gruaje që hedh mbeturina në Lepenc nuk po ndalen, ndërsa është shfaqur një rast i ri i hedhjes së papërgjegjshme të mbeturinave. Në pamje shihen dy persona me një motor dhe rimorkio, të cilët ndalojnë dhe i shkarkojnë mbeturinat drejtpërdrejt në rrugë.
Sipas të parit të Shkupit, Orce Gjorgjievski, po kërkojnë mënyra për t’i stimuluar qytetarët që mbeturinat t’i hedhin në mënyrë të rregullt ndërsa po shqyrtohet edhe mundësia e shpërblimeve për qytetarët që do të incizojnë dhe raportojnë raste të hedhjes së parregullt të mbeturinave.
“Unë nuk kam 2500 apo 5000 inspektorë që të observoj të gjitha lokacionet por kur jemi tek Drisla, do të propozoj tek këshilli i Qytetit të Shkupit që në seancën e radhës që një apo dy ditë në muaj që pa pagesë të dërgohen mbeturinat dhe po ashtu mendoj se nuk është propozim i keq që të vendosim një shumë parash për qytetarët që do të denoncojnë me fotografi kësi lloj sjelljesh”tha; Orce Gjorgjievski – Kryetar i Qytetit të Shkupit.
Ndërkohë, Gjorgjievski paralajmëroi se është drejt përfundimit edhe procedura për vendosjen e kamerave në më shumë se 200 lokacione në qytet, në vendet ku krijohen deponi të egra, si dhe në parqe dhe kënde lojërash për fëmijë./Alsat.mk
Burimi: lajmpress.org
