Gjermania deporton 6200 azilkërkues në gjashtë muaj. Maqedonia e Veriut me 454 të dëbuar, Shqipëria me 402 dhe Gjeorgjia me 397 ishin vendet ku janë dëbuar më së shumti refugjatë që nuk kanë përmbushur kushtet për njohje të azilit.
Përveç kësaj, 1,826 azilkërkues u kthyen sipas Rregullores së Dublinit, transmeton albinfo.ch. Këta u dërguan në vende të tjera të BE-së.
Qeveria Federale ka paguar gjithsej 580,000 euro për “mini fluturimet çarter” gjë që kritikohet nga Partia e Majtë.
Në gjysmën e parë të vitit 2022, autoritetet deportuan 6,198 të huaj të cilëve iu kërkua të largoheshin nga Gjermania, shkruan dpa.de. Qeveria federale ka dhënë këtë njoftim, e pyetur nga Grupi Parlamentar i Partisë së Majtë në Bundestag.
Sipas përgjigjes, autoritetet kanë dëbuar gjithsej 35 persona në njëmbëdhjetë “mini fluturime çarter” gjatë gjashtë muajve, disa prej tyre drejt vendeve të tjera të BE-së. Fluturimet me maksimum katër të huaj të cilëve u kërkohet të largohen nga vendi quhen mini-çarter. Kostoja e fluturimeve të tilla në periudhën janar-qershor ishte gjithsej 580,000 euro për shtetin. Riatdhesimet e tjera nuk përfshihen në këto kosto.
Për krahasim: Në vitin 2020 në tërësi, Qeveria Federale kishte organizuar 21 mini-fluturime çarter për 39 azilkërkues të refuzuar, përcjell albinfo.ch. Në raste individuale, shpenzimet për këto fluturime deportimi arrinin në mbi 100 mijë euro për një ose dy persona që ishin të detyruar të largoheshin nga vendi.
Grupi Parlamentar i Majtë ka kritikuar praktikën e mini-fluturimeve çarter: “Është e habitshme se çfarë burimesh janë të gatshme të përdorin qeveria federale dhe ato të landeve, për t’i larguar njerëzit nga vendi,” thotë zëdhënësja e të majtës, përgjegjëse për refugjatët, Clara Bünger.
Ministria Federale e Brendshme ka bërë të ditur për mediat gjermane se marrëveshja e koalicionit parashikon një “ofensivë riatdhesimi për të zbatuar në mënyrë më të vazhdueshme detyrimin për t’u larguar nga vendi”.
Sipas kësaj, parashikohen rregullore për të lehtësuar identifikimin e kriminelëve dhe personave të rrezikshëm. Aktualisht janë duke u shqyrtuar ndryshime të mëtejshme në ligj.
