Kryetari i Kuvendit të Republikës së Maqedonisë së Veriut, Afrim Gashi, gjatë vizitës së tij zyrtare në Vatikan ka zhvilluar një takim të rëndësishëm me Sekretarin e Shtetit të Selisë së Shenjtë, Kardinalin Pietro Parolin.
Në këtë takim, palët diskutuan mbi avancimin e mëtejshëm të bashkëpunimit bilateral dhe forcimin e dialogut institucional ndërmjet Maqedonisë së Veriut dhe Vatikanit. Theksi u vendos në zgjerimin e bashkëpunimit në fusha me interes të përbashkët, përfshirë kulturën, arsimin, si dhe ruajtjen e trashëgimisë kulturore dhe shpirtërore.
Gjatë bisedimeve u theksua gjithashtu rëndësia e promovimit të vlerave të dialogut, tolerancës dhe mirëkuptimit ndërfetar, veçanërisht në një kohë sfidash globale që kërkojnë më shumë bashkëpunim mes shteteve dhe institucioneve.
Gashi ritheksoi përkushtimin e Republikës së Maqedonisë së Veriut për ndërtimin e partneriteteve të qëndrueshme ndërkombëtare, të cilat kontribuojnë në stabilitetin rajonal, forcimin e bashkëpunimit dhe afrimin ndërmjet popujve.
Vizita në Vatikan vlerësohet si një hap i rëndësishëm në thellimin e marrëdhënieve diplomatike dhe kulturore mes dy palëve.
Burimi: alfax.mk
