Kryetari i Kuvendit të Maqedonisë së Veriut, Afrim Gashi, ka theksuar rëndësinë e diplomacisë parlamentare dhe të bashkëpunimit institucional në realizimin e prioriteteve strategjike të vendit.
Gashi, përmes një njoftimi, bëri të ditur se sot ka marrë pjesë në sesionin e punës së Këshillit të Ambasadorëve, ku është diskutuar për rolin e diplomacisë parlamentare si pjesë e rëndësishme e politikës së jashtme, si dhe për kontributin e Kuvendit në përmbushjen e objektivave strategjike të shtetit.
“Diskutuam për rëndësinë e diplomacisë parlamentare si një pjesë e rëndësishme e politikës së jashtme, si dhe për rolin e Kuvendit në realizimin e prioriteteve tona strategjike – integrimin evropian, forcimin e pozitës në NATO, fqinjësinë e mirë dhe bashkëpunimin rajonal”, ka shkruar Gashi.
Ai vlerësoi se ndryshimet e mëdha në skenën gjeopolitike kërkojnë një diplomaci më aktive dhe të koordinuar, si dhe bashkëpunim të fuqishëm ndërmjet institucioneve.
“Në një kohë të ndryshimeve të mëdha gjeopolitike, na nevojiten diplomaci aktive dhe e koordinuar, bashkëpunim i fortë institucional dhe përfaqësim i qartë i interesave shtetërore”, theksoi kryeparlamentari.
Sipas Gashit, objektivi i përbashkët i institucioneve dhe aktorëve politikë duhet të jetë ndërtimi i një shteti të fuqishëm, stabil dhe të orientuar drejt Bashkimit Evropian, me zhvillim dhe prosperitet ekonomik.
“Qëllimi ynë i përbashkët është një Republikë e Maqedonisë së Veriut e fortë, stabile, evropiane dhe ekonomikisht e prosperuar”, përfundoi Gashi.
Burimi: alfax.mk
