Nesër me fillim nga ora 12:00 Kombëtarja e Kosovës dhe ajo e Shqipërisë do të njoftohen me kundërshtarët e tyre në Kampionatin Evropian Euro 2024.
Hedhja e shortit për fazën eliminatore të Euro 2024 do të bëhet nesër në Frankfurt të Gjermanisë, ku Kosova dhe Shqipëria do të mësojnë rivalët e tyre.
Në fazën e eliminatoreve të këtij turneu pjesëmarrëse do të jenë 53 skuadra, kurse Gjermania në rolin e organizatores së Euro 2024 kualifikohet automatikisht dhe për këtë arsye nuk merr pjesë në shortin e nesërm.
Ndërkaq, si pasojë e sanksioneve nga UEFA dhe FIFA, për shkak të pushtimit ndaj Ukrainës, Rusia është përjashtuar edhe nga ky turne, dhe nuk do të jetë pjesë e shortit të Euro 2024.
53 skuadrat që marrin pjesë në shortin e kualifikueseve më 9 tetor 2022, janë ndarë nëpër gjashtë vazo në bazë të renditjes së përgjithshme të Ligës së Kombeve 2022/23, dhe do të ndahen në dhjetë grupe kualifikuese, shtatë nga të cilat me shtatë me pesë skuadra (nga Grupi A deri në Grupin G) dhe tre grupe me nga gjashtë skuadra (nga Grupi H deri në Grupin J).
Ndeshjet e fazës kualifikuese do të nisin në muajin mars dhe do të përfundojnë në nëntor 2023. Në përfundim të kualifikueseve, dhjetë skuadrat e renditura të parat në grupe së bashku me 10 vendet e dyta kualifikohen automatikisht për në fazën finale. Tre skuadrat e tjera pjesëmarrëse do të dalin nga faza play-off që do të zhvillohet në mars 2024.
Kosova është e pozicionuar në vazon numër 4, së bashku me Gjeorgjinë, Greqinë, Turqinë, Kazakistanin, Luksemburgun, Azerbajxhanin, Bullgarinë, Ishujt Faroe dhe Maqedoninë e Veriut.
Në anën tjetër, Shqipëria zë vend në vazon numër 3, ku të përfshira janë edhe Ukraina, Islanda, Norvegjia, Sllovenia, Irlanda, Mali i Zi, Rumania, Suedia dhe Armenia.
Bazuar në vendimin e Komitetit Ekzekutiv të UEFA-s këto skuadra nuk mund të jenë pjesë e të njëjtit grup: Armeni/Azerbajxhan, Bjellorusi/Ukrainë, Gjibraltar/Spanjë, Kosovë/Bosnje-Hercegovinë dhe Kosovë/Serbi.
