Një seri e re dokumentesh mbi emërimin e Peter Mandelson si ambasador i Britanisë së Madhe në Shtetet e Bashkuara pritet të publikohet sot, duke rikthyer në qendër të vëmendjes një nga skandalet më të mëdha politike që ka goditur qeverinë e kryeministrit Keir Starmer.
Mbi 1.000 faqe materiale, të ndara në tre volume, përfshijnë detaje të reja mbi procesin e emërimit të Mandelson, ndërsa më shumë se 160 faqe përmbajnë mesazhe dhe komunikime të tij në WhatsApp. Publikimi i dokumenteve pritet të hedhë dritë mbi paralajmërimet që kishin marrë autoritetet britanike lidhur me marrëdhëniet e tij me Jeffrey Epstein.
Mandelson u shkarkua nga posti i ambasadorit në shtator 2025, pasi dolën në pah informacione të reja mbi lidhjet e tij me financierin e dënuar për krime seksuale. Skandali shkaktoi reagime të forta politike dhe ngriti pikëpyetje serioze mbi mënyrën se si ishte miratuar emërimi i tij në një nga postet më të rëndësishme diplomatike të Mbretërisë së Bashkuar.
Dokumentet e publikuara më herët kishin treguar se kryeministri Starmer ishte paralajmëruar se lidhjet e Mandelson me Epstein përbënin një “rrezik reputacional” për qeverinë. Megjithatë, emërimi i tij u miratua në dhjetor 2024, me argumentin se ai zotëronte përvojë të gjerë diplomatike.
Sipas materialeve të deritanishme, shërbimet e sigurisë kishin rekomanduar që Mandelson të mos merrte nivelin më të lartë të autorizimit të sigurisë. Pavarësisht këtyre rezervave, Ministria e Jashtme miratoi aksesin e tij dhe procedura e emërimit vazhdoi.
Burimi: opinion.al
