Edita Tahiri, ish-kryenegociatore e Kosovës në dialogun me Serbinë, komentoi në edicionin e pasdites me Armela Ferkon tensionet në veri të Kosovës dhe sulmet ndaj një ekipi të KFOR-it.
Edita Tahiri tha se situata vijon të jetë e tensionuar dhe e rëndë. Sipas saj, Serbia po tenton të destabilizojë veriut për agjendat e saj, ndërsa për qeverinë Kurti, Tahiri tha se nuk janë treguar vigjilentë.
“Serbia po kërkon arsye që të destabilizojë veriun për agjenda të saja gjeopolitike por edhe nga qeveria jonë pati disa lëshime të karakterit taktik. Kur vjen situata tek veriu, qeveria e Kosovës, dhe ne duhet të jemi tepër vigjilentë.
Aty ku armiku i fryn zjarrit, e jona pra si palë dhe udhëheqje shtetërore në çdo mënyrë duhet të pengojë shfaqjen e zjarrit dhe eskalimin.”-tha Tahiri.
Edita Tahiri deklaroi se Serbia duke parë që ndërkombëtarët nuk kanë ndërhyrë për të hequr barrikadat, po shfrytëzon këtë hapësirë për të prodhuar një konflikt dhe kanë dhënë paralajmërime për konflikt të armatosur.
“Sipas mendimit tim nuk mund ta bëjë Serbia se ne s’jemi vetëm. Kur e bëmë këtë shtet të pavaruar e kemi bërë me aleatët, amerikanët dhe KFOR-in. Po të ishte e vetmuar Kosova, Vuçiçi do provonte dhe më herët të shkaktonte diçka jo të mirë. Duhet të jemi tepër vigjilentë.”-tha Tahiri.
Tahiri kritikoi edhe qeverinë e Albin Kurtit. Sipas saj, qeveria Kurti gaboi në hapat e saj duke u marrë me gjëra teknike, si targat, dhe nuk u koordinua me partnerët ndërkombëtarë.
“Këto gabime, shkaktuan hapësirë për lojërat që po i bën Vuçiçi. Shumë po vonohet BE, u desh të therrasin një takim menjëhershëm trepalësh në Bruksel, që s’po ndodh. BE në tensione gjithmonë ka ndërhyrë, por nuk e kuptoj çfarë po ndodh tani. Qeveria nuk duhet të nxitohet, të koordinohet herë të tjera.”-tha Tahiri.
