Dymbëdhjetë emigrantë kanë vdekur në kushtet e ftohta të motit në Turqi, pranë kufirit me Greqinë, ku secili shtet fajëson tjetrin për tragjedinë.
Turqia akuzon zyrtarët grekë të kufirit se e kanë detyruar grupin të kthehet përtej kufirit, duke rezultuar në vdekjen e tyre.
Nga ana tjetër, Greqia e mohon ashpër këtë pretendim.
Dy vendet mesdhetare janë përplasur shpesh për fatin e emigrantëve që kalojnë kufijtë e tyre tokësorë dhe detarë.
Zyrtarët turq thanë se nëntë trupa u gjetën të mërkurën në mëngjes, derisa dy të tjerë u gjetën pas kërkimeve.
Një person tjetër u gjet se kishte vdekur në spital pasi kishte pësuar ngrirje në trup.
Ministri i Brendshëm turk, Suleyman Soylu, tha se rojet kufitare greke i kishin zhveshur njerëzit nga rrobat dhe këpucët pas mbërritjes, përpara se t’i kthenin në ato kushte.
Ndërkohë, Ministri grek i Migracionit, Notis Mitarachi, tha se vdekjet ishin një tragjedi, por “e vërteta pas këtij incidenti nuk ka asnjë ngjashmëri me propagandën e rreme të shtyrë nga homologu im”.
