Flamurtari i Vlorës feston sot 100-vjetorin e krijimit të klubit.
Të shumta kanë qenë urimet për kuqezinjtë, një ndër skuadrat më të njohura dhe të lavdishme të futbollit shqiptar.
Mes tyre edhe ai i Armand Dukës, presidentit të FSHF-së, i cili shkruan këto radhë në faqen e tij zyrtare. “FC Flamurtari mbush sot 100 vjeç!
Një shekull histori e mbushur plot me momente magjike dhe emocione të mëdha.
Vlora dhe gjithë Shqipëria krenohen me historinë e lavdishme të djemve kuqezi.
Në këtë 100 vjetor kam kënaqësinë dhe privilegjin që t’i përcjell urimet më të mira në emër të Federatës Shqiptare të Futbollit dhe emrin tim personal.
I urojmë klubit legjendar të futbollit shqiptar sa më shumë suksese dhe rezultate pozitive në këtë shekull të ri që po nisin sot!”, përfundon urimi i kreut të futbollit shqiptar.
Flamurtari shkëlqeu në fundin e viteve ’80 në arenën ndërkombëtare. Kuqezinjtë mbërritën deri në 16 skuadrat më të mira të Kupës UEFA në sezonin 1987/198.
Të paharrueshme mbeten duelet ndaj Barcelonës së madhe dhe eliminimi i Partizanit të Beogradit. Flamurtari zhvilloi katër ndeshje përballë katalanasve, duke fituar një, barazuar dy e humbur një.
