Administrata Doganore në muajin korrik ka realizuar arkëtimin më të lartë mujor të të ardhurave në histori, në vlerë prej 14,14 miliardë denarësh, që paraqet një rritje prej 1,5 miliardë denarësh ose 11,8 për qind krahasuar me korrikun e vitit të kaluar.
Drejtori i Administratës Doganore, Boban Nikollovski, tha se këto të dhëna dëshmojnë se sistemi i ndërtuar gjatë dy viteve të fundit po e rrit kapacitetin e shtetit për të gjeneruar të ardhura më të larta.
“Aspekti më i rëndësishëm i faktit që për herë të katërt në dy vitet e fundit po tejkalojmë rekordet e arkëtimit të të ardhurave në nivele historike – duke filluar nga mbi 12 miliardë denarë në korrikun e vitit të kaluar dhe tani mbi 14 miliardë denarë – nuk është vetëm shifra, por trendi që ajo pasqyron. Kjo dëshmon se sukseset nuk janë raste të izoluara, por rezultat i efikasitetit të sistemit që kemi ndërtuar gjatë dy viteve të fundit. Një sistem i tillë na mundëson të gjenerojmë të ardhura më të larta dhe të sigurojmë kushte më të mira jetese për qytetarët”, theksoi Nikollovski.
Sipas analizës së arkëtimit të të ardhurave gjatë muajit korrik, rritja kryesisht është rezultat i blerjeve të shtuara të pajisjeve nga Ministria e Mbrojtjes, rritjes së importit të naftës dhe derivateve të naftës, si dhe rritjes së importit të duhanit dhe produkteve të duhanit.
Në mënyrë kumulative, nga fillimi i vitit deri në fund të korrikut, Administrata Doganore ka realizuar të ardhura totale prej 80,5 miliardë denarësh, ose rreth 1,3 miliardë euro, që është 87,6 milionë euro më shumë krahasuar me të njëjtën periudhë të vitit të kaluar.
Nikollovski shtoi se si institucion që mbledh miliarda denarë për Buxhetin e shtetit, detyra e Administratës Doganore është të sigurojë kushte më të mira për zhvillimin e biznesit dhe rritjen e konkurrueshmërisë së ekonomisë së Maqedonisë.
“Qëllimi ynë është i qartë: po ndërtojmë një sistem ku siguria dhe mbushja e Buxhetit nuk e pengojnë ekonominë, por zhvillohen paralelisht përmes modernizimit dhe menaxhimit të rrezikut. Vazhdojmë të ndërtojmë një Administratë Doganore moderne, efikase dhe profesionale, e cila vazhdimisht sjell rezultate dhe kontribuon për një ekonomi më të fuqishme”, deklaroi Nikollovski.
Burimi: alfax.mk
