Kandidati i VLEN për komunën e Haraçinës, Daut Beqiri, në një deklaratë publike tha se ka ardhur koha që kjo komunë të hapë një kapitull të ri të zhvillimit dhe dinjitetit. Ai falënderoi udhëheqësinë aktuale për përpjekjet e bëra, por theksoi se Haraçina meriton shumë më tepër.
“Meriton ujë të pastër në çdo shtëpi, rrugë të asfaltuara në çdo mëhallë, shkolla moderne dhe hapësira të denja për fëmijët tanë. Haraçina nuk duhet të mbetet më sinonim i harresës, por të bëhet shembull i zhvillimit,” ka thënë Beqiri.
Beqiri gjithashtu ka paralajmëruar projekte konkrete siç është furnizim me ujë të pijshëm për çdo shtëpi, kanalizim modern, stadium dhe park të gjelbër për rininë dhe familjet, investime në shkolla, asfaltim të rrugëve në Mojancë, Grushinë e Orllancë si dhe mbulimin e plotë të kanalit famëkeq që për vite ka qenë plagë e hapur për Haraçinën.
“Unë nuk ofroj iluzione, por punë të ndershme dhe rezultate konkrete. Koha e fjalëve të bukura ka mbaruar, tani është koha e veprave. Me besimin dhe mbështetjen tuaj, Haraçina do të kthehet në shembull të krenarisë dhe zhvillimit,” është shprehur më tej kandidati i VLEN-it për komunën e Haraçinës, Daut Beqiri.
