Terapia me radiofrekuencë (RF), e quajtur edhe si “skin tightening” (shtrëngimi i lëkurës) me radiofrekuencë, është një metodë jokirurgjikale për të tërhequr lëkurën
Procedura përfshin përdorimin e “valëve të energjisë për të ngrohur shtresën e thellë të lëkurës tuaj të njohur si dermis”. Kjo nxehtësi stimulon prodhimin e kolagjenit.
Kolagjeni është proteina më e zakonshme në trupin tuaj, që i jep lëkurës qëndrueshmëri.
Ndërsa plakeni, qelizat tuaja prodhojnë më pak kolagjen, gjë që çon në lëkura të varura dhe rrudha. Kjo ndodh rreth moshës 35 deri në 40 vjeç kur sasia dhe cilësia e kolagjenit tuaj fillon të bjerë, shkruan HealthLine.
Si funksionon kjo terapi dhe çfarë përfitimesh të mundshme ka për lëkurën?
Çdo lloj teknologjie që bën RF funksionon në të njëjtën mënyrë. Valët RF ngrohin shtresën e thellë të lëkurës tuaj midis 50-75°C.
Studimet kanë zbuluar se mbajtja e një temperature mbi 46°C për më shumë se 3 minuta bën që trupi juaj të çlirojë proteinat e goditjes nga nxehtësia (heat-shock proteins). Këto proteina stimulojnë trupin për të krijuar fibra të reja kolagjeni.
Procedura zakonisht zgjat më pak se një orë dhe duhet të jetë pothuajse pa dhimbje.
Çfarë janë valët e radiofrekuencës?
Valët RF janë një formë rrezatimi. Rrezatimi është lëshimi i energjisë në formën e valëve elektromagnetike.
Mund të klasifikohet si energji e ulët ose energji e lartë në varësi të sasisë së energjisë së çliruar. Rrezet X dhe rrezet gama janë shembuj të rrezatimit me energji të lartë ndërsa valët RF konsiderohen me energji të ulët.
Valët e radios, WiFi dhe mikrovalët janë të gjitha format e valëve RF. Forma e rrezatimit të përdorur me RF lëshon rreth një miliard herë më pak energji sesa rrezet X.
Përfitimet e mundshme
Përfitimi kryesor i terapisë RF është zbehja e rrudhave. Megjithatë, ajo mund të ndihmojë gjithashtu në luftimin e dëmtimit të diellit për shkak të aftësisë për të stimuluar prodhimin e kolagjenit.
Një studim i vitit 2018 shqyrtoi efektin e terapisë RF në rrudhat rreth syve të 70 grave të moshës së mesme. Studiuesit zbuluan se tre trajtime për 6 javë reduktuan ndjeshëm rrudhat e tyre.
Rreziqet e shtrëngimit të lëkurës me radiofrekuencë
Shtrëngimi i lëkurës me RF zakonisht konsiderohet i sigurt kur kryhet nga një mjek i certifikuar. Nëse procedura kryhet gabimisht, është e mundur të digjeni, citon Anabel.
Efektet anësore më të zakonshme përfshijnë:
– ënjtje e përkohshme
– skuqje
– ndjesi shpimi gjilpërash
Njerëzit me lëkurë më të errët janë në një rrezik më të lartë të efekteve anësore nga trajtimet me lazer dhe RF.
Megjithëse efektet afatgjata të rrezatimit me energji të ulët nuk janë plotësisht të njohura, nuk ka pasur asnjë provë përfundimtare në këtë kohë që sugjeron se rrezatimi RF përbën një rrezik për shëndetin e njerëzve.
Procedura është e miratuar nga FDA.
