Bullgaria i është bashkuar disa vendeve evropiane me ndalesën e hyrjes së automjeteve private me targa ruse, transmeton Anadolu.
Në deklaratën e publikuar në faqen zyrtare të Agjencisë së Doganave thuhet se automjeteve me targa ruse me deri në 10 pasagjerë u ndalohet hyrja dhe kalimi transit në vend.
Sipas deklaratës, Agjencia e Doganave, Ministria e Punëve të Brendshme dhe Policia Kufitare do të jenë përgjegjëse për mbikëqyrjen e këtij ndalimi të ri, i cili u fut me rekomandimin e Komisionit Evropian dhe u aplikua ndaj Rusisë për shkak të luftës që Rusia nisi kundër Ukrainës.
Theksohet se automjetet që i përkasin misioneve diplomatike ruse do të përjashtohen nga kjo praktikë.
Është bërë e ditur se të gjitha automjeteve të tjera me targa ruse që ndodhen në Bullgari, u është dhënë 6 muaj afat për t’u larguar nga vendi.
Kryeinspektori i Policisë Kufitare, Anton Zlatanov, në deklaratën e tij tha se përveç automjeteve me targa ruse, ndalim do të vendoset edhe për disa pasuri personale të qytetarëve rusë, lista e të cilave do të përcaktohet më vonë.
Zlatanov tha se numri i automjeteve me targa ruse që hyjnë në Bullgari është relativisht i ulët.
Numri i vendeve në Evropë që ndaluan automjetet me targa ruse u rrit në 8
Me Bullgarinë, numri i vendeve në Evropë që ndalojnë automjetet me targa ruse është rritur në 8. Ky ndalim ishte vendosur më parë në Estoni, Letoni, Lituani, Finlandë, Poloni, Gjermani dhe Norvegji, e cila nuk është anëtare e Bashkimit Evropian (BE), por është e përfshirë në zonën Shengen.
