BMW “aksidentalisht” zbulon modelin e ri elektrik, fillojnë spekulimet

Prodhuesit e veturave zakonisht zbulojnë modele të reja në prezantime zyrtare, megjithatë, ndonjëherë një dizajn i ri shfaqet i paplanifikuar.

Ky duket të jetë rasti me BMW-në, e cila mund të ketë ofruar pa dashje një pamje të një automjeti elektrik të ardhshëm në faqen e saj të internetit gjermane, duke shkaktuar një valë spekulimesh.

Vetura misterioze, një sedan elektrik elegant dhe sportiv, nuk u shfaq në faqen e internetit për konceptin e ri, por në video të animuara që synonin të shfaqnin veçoritë e asistencës së shoferit me teknologji të lartë të SUV-it të ri BMW iX3.

Në vend që të përdornin iX3 për të demonstruar veçori si kontrolli i përparuar i shpejtësisë dhe parkimi i automatizuar, animacionet treguan një veturë krejtësisht të ndryshme, të paparë më parë, me katër dyer.

Ky model mbart qartë gjuhën e dizajnit të gjeneratës së ardhshme të automjeteve elektrike të BMW-së, të quajtur Neue Klasse.

Familja e re përfaqëson një ndryshim monumental për prodhuesin gjerman, duke u përqendruar në teknologjinë më të përparuar, qëndrueshmërinë dhe një filozofi të freskët dizajni.

Dy anëtarët e parë të konfirmuar të kësaj familjeje janë SUV iX3 dhe sedani i ri që do të ringjallë emrin i3.

Megjithatë, vetura në video nuk përputhet plotësisht me i3-shin e ardhshëm, i cili është parë tashmë në formë koncepti dhe në foto spiune.

Vetë dizajni është një interpretim i qartë i stilit të ardhshëm të BMW-së.

Teoria më e popullarizuar është se ky automjet elektrik misterioz është një pamje e gjeneratës së ardhshme BMW i4.

Deri më tani, BMW nuk ka komentuar mbi pamjen e papritur të këtij automjeti.