Ministria e Jashtme e Iranit ka thënë se bisedimet në Vjenë në fillim të këtij muaji për të rivendosur marrëveshjen e tij bërthamore të vitit 2015 dhanë rezultate, por nuk adresuan plotësisht pritshmëritë e Teheranit.
Zëdhënësi i Ministrisë së Jashtme Nasser Kanani u tha gazetarëve të hënën se ishte bërë “përparim i konsiderueshëm” gjatë bisedimeve disaditore të ndërmjetësuara nga Bashkimi Evropian në kryeqytetin austriak.
“Por ky përparim nuk i përgjigjej plotësisht kërkesave ligjore të Republikës Islamike të Iranit dhe ne kishim pritshmëri të tjera nga palët e tjera që ne besuam se duheshin siguruar”, tha ai.
Kanani tha se një marrëveshje mund të arrihet në “të ardhmen e afërt” me kusht që palët e tjera, veçanërisht Shtetet e Bashkuara, të marrin në konsideratë “vijat e kuqe” të Iranit dhe të garantojnë se do të gëzojë përfitimet që u premtuan në kuadër të Planit të Përbashkët Gjithëpërfshirës të Veprimit (JCPOA), siç njihet zyrtarisht marrëveshja.
Diskutimet e brendshme janë duke vazhduar në Teheran në nivelet më të larta dhe kontaktet janë mbajtur me bllokun evropian, shtoi zëdhënësi.
Pas raundit të fundit të bisedimeve që përfundoi më 8 gusht, BE qarkulloi atë që e quajti “tekst përfundimtar” dhe u kërkoi të gjitha palëve të merrnin vendimet e nevojshme politike për të finalizuar një marrëveshje.
Uashingtoni ka rënë dakord me tekstin, por Teherani ka sinjalizuar se ka konsiderata të tjera.
Ministri i Jashtëm iranian u tha gazetarëve të hënën se Irani do t’i përcjellë zyrtarisht bllokut “opinionin e tij përfundimtar” mbi tekstin evropian deri në fund të ditës.
“Ne jemi pas një marrëveshjeje të mirë, të qëndrueshme dhe të fortë, por nëse pala tjetër flet për një plan B, ne kemi gjithashtu një plan B”, tha Hossein Amirabdollahian, duke shtuar se Irani po pret “fleksibilitetin” e ShBA-së për çështjen e garancive.
