Kryetari i Partisë Demokratike, Sali Berisha, është shprehur se shefi i CIA-s kishte deklaruar se McGonigal ishte bërë “princ” i Tiranës.
Komentet Berisha i bëri teksa ishte i ftuar në Syri TV, ku tha se aspekti më i rëndësishëm i skandalit McGonigal në Shqipëri është gjobëvënia dhe përpjekjet për copëtimin e opozitës shqiptare.
Ndërsa përsa i përket fotove dhe videove të privatësisë që ai ka deklaruar se zotëron për personat e përfshirë në aferën “McGonigal”, Berisha ka deklaruar se nuk do të bëjë asgjë publike.
“Nuk më ke parë kurrë të publikoj foto dhe video privatësie. Nuk ja kam adresuar asnjë personi të veçantë. Siç e tha ai ish-oficeri i CIA-s, ai këtu ishte bërë si princi i Tiranës. Aspekti më i tmerrshëm i tij është gjobvënie dhe përpjekja për të copëtuar opozitën shqiptare.
A ka lidhje pista Deripaska, këtë e hetojnë institucionet amerikane. A u ndërrua licenca për llogari të Duçkës dhe Nezës, ju hoq një kompanie ruse dhe ju dha një tjetre po ruse. Duçka, Neza dhe ka mundësi edhe vetë McGonigal u bënë aksioner. Shqipëria paguan 300 milion të tjera. Videot janë më të parëndësishmet. Ai ka aktin më të rëndë të tradhëtisë së vendit të vetë. Rama është marrë plotësisht me çështjen e zotit Berisha. Këto di unë”, është shprehur Berisha.
