Berisha i kënaqur me raportin e BE. Kreu i PD shikon vetëm shqetësimet: Hija e zezë e korrupsionit është në çdo rresht të raportit

Raporti i Parlamentit Europian për Shqipërinë u përshëndet nga Sali Berisha, i cili kishte leximin e tij për atë që shkruhej në dokument.

I dha zë rreshtave që kritikonin qeverinë, ndonëse pranoi se raporti kishte porosi edhe për opozitën.

I kënaqur me konstatimet e eurodeputeteve se zgjedhjet u zhvilluan në një fushë të pabarabartë, Berisha u zotua se opozita do bashkëpunojë me mazhorancën për të zbatuar të gjitha rekomandimet e Parlamentit Europian. Ironizoi edhe leximin që do i bëjnë përfaqësuesit e mazhorancës dokumentit.

Konferencën e shfrytëzoi edhe për të mbështetur aleatin e tij në qeli, duke akuzuar Edi Ramën se, me porosi të tij, po keqtrajtohet Ilir Meta.

Berisha konfirmoi edhe njëherë marrëveshjen me partitë e reja për një sistem proporcional kombëtar me lista të hapura, me një prag 4 përqind.