Në shumë vendbanime të Kosovës kohët e fundit është bërë traditë që në përkujtim dhe nderim të dëshmorëve të kombit, të organizohen aksione për dhurimin vullnetar të gjakut. Kësaj tradite humanitare ka vite që po i bashkohen edhe qytetarët e Irzniqit të Deçanit, e sidomos rinia e këtij lokaliteti.
“Po kjo është një ndjenjë e jashtëzakonshme me të cilën duhet të ndjehet krenar çdo shqiptar, poashtu edhe banorët e fshatit Irzniq që organizojmë një aktivitet të tillë edhe me dhurimin e gjakut gjë që nënkupton që ne në njëfarë mënyrë përkujtojmë sakrificën dhe gjakun që ata kanë dhënë për lirinë që ne e gëzojmë sot”, tha Fadil Dervishaj, dhurues, familjar dëshmori.
“Nëpërmes kësaj forme ne i përkujtojmë të rënët dëshmorët luftëtarët, luftën e UÇK-së të cilët përmes veprës së tyre e ndihmuan çlirimin e vendit”, tha për RTK-në Ndriçim Çekaj, dhurues.
Aksionit për dhurimin e gjakut në Irzniq i janë bashkuar edhe mërgimtarët që këto ditë po i kalojnë pushimet në vendlindje.
“Mërgata është numër një që po dhuron gjak, është shumë e organizuar, po japin gjak familjarët e dëshmorëve, veteranët ish ushtarë të UÇK-së dhe rani ka në nis tedhe të rinjtë me dhanë gjak si shenjë simbolike për nder të dëshmorëve të kombit”, tha Shaqir Dacaj, kryetar i Këshillit të fshatit.
Fshati Irzniq lirisë së Kosovës ia fali 20 dëshmorë dhe martirë të kombit. Banorët e Irzniqit dhurojnë gjak në shenjë nderimi për të rënët për liri.
Burimi: botasot.info
