Gjermania dhe Bashkimi Evropian po shqyrtojnë nëse do ta shpallin Gardën Revolucionare të Iranit një organizatë terroriste, deklaroi sot ministrja e Jashtme gjermane, Annalena Baerbock.
“E bëra të qartë javën e kaluar se do të nisim një paketë tjetër sanksionesh dhe se do të shqyrtojmë se si mund ta përfshijmë Gardën Revolucionare si një organizatë terroriste”, tha Baerbock për televizionin gjerman ARD.
Baerbock i bëri komentet pasi Garda Revolucionare paralajmëroi protestuesit se e shtuna ishte dita e fundit për të dalë në rrugë, që do të thotë se forcat e sigurisë mund të intensifikojnë një goditje tashmë të ashpër ndaj trazirave të përhapura.
Gjermania njoftoi javën e kaluar se po shtrëngonte kufizimet e hyrjes ndaj zyrtarëve iranianë, përveç paketës së sanksioneve të njoftuara tashmë të BE-së.
