Türkiye goditi 89 objektiva terroriste të YPG/PKK-së gjatë sulmeve ajrore në rajonet veriore të Irakut dhe Sirisë, tha Ministria e Mbrojtjes Kombëtare, transmeton Anadolu Agency (AA).
“Me operacionin ‘Kthetra-Shpata’, u shkatërruan 89 objektiva terroriste – 81 objektiva në fazën e parë dhe tetë të tjera këtë mëngjes – duke përfshirë strehimore, bunkerë, shpella, tunele, depo municionesh dhe të ashtuquajtura shtabe dhe kampe trajnimi që u përkasin terroristëve, të cilët kërcënojnë vendin tonë, kombin dhe sigurinë kufitare”, thuhet në njoftimin e ministrisë.
Deklarata erdhi pasi Türkiye filloi sot herët operacionin “Kthetra-Shpata”, një fushatë ajrore ndërkufitare kundër grupit terrorist KCK/YPG/PKK në veri të Irakut dhe Sirisë. Ministria tha se operacioni u krye në përputhje me të drejtën e vetëmbrojtjes sipas nenit 51 të Kartës së OKB-së.
Türkiye kreu një “operacion të suksesshëm” në rajonet Kandil, Asos dhe Hakurk të Irakut verior dhe në rajonet Burimi Arab, Tal Rifat, Jazira dhe Derik të Sirisë veriore, shtoi ministria.
“Midis terroristëve të neutralizuar në operacionin ajror kishte të ashtuquajtur udhëheqës të organizatës terroriste”, tha gjithashtu ministria.
Operacioni erdhi pas sulmit terrorist të së dielës së kaluar në rrugën e frekuentuar Istiklal të Istanbulit në të cilin u vranë gjashtë persona dhe u plagosën 81.
Ai u krye për të eliminuar sulmet terroriste kundër popullit turk dhe forcave të sigurisë nga zonat veriore të Irakut dhe Sirisë, dhe për të garantuar sigurinë kufitare të Türkiyes, tha Ministria e Mbrojtjes Kombëtare.
“Pas operacionit, në të cilin u përdorën kryesisht municione vendase dhe kombëtare, të gjithë avionët tanë u kthyen të sigurt në bazat e tyre”, njoftohet më tej.
Në fushatën e saj terroriste më shumë se 35-vjeçare kundër Türkiyes, PKK, e listuar si organizatë terroriste nga Türkiye, SHBA-ja dhe BE-ja, ka qenë përgjegjëse për vdekjen e më shumë se 40.000 njerëzve, duke përfshirë gra, fëmijë dhe foshnja. YPG është dega siriane e PKK-së.
Burimi: GAZETA.MK
