Julian Assange, themelues i WikiLeaks do të kërkojë leje nga burgu për të marrë pjesë në funeralin e kreatores, Dame Vivienne Westwood, thotë gruaja e tij, Stella për mediat australiane, raporton BBC.
Westwood, e cila vdiq të enjten në moshën 81 vjeçare, ishte mbështetëse dhe mike e Assange për më shumë se një dekadë.
“Ajo ishte mike dhe mbështetëse e madhe, sigurisht që ikja e saj për ne mbetet humbje e madhe”, tha Stella Assange për të përditshmet australiane “Sydney Morning Herald” dhe “The Age”.
Mirëpo, zëdhënësi i burgut tha për BBC se një kërkesë e tij nuk mund të miratohet, sepse leje të tillë jepet vetëm për të afërmit.
Assange i burgosur në burgun e sigurisë së lartë Belmarsh në Mbretërinë e Bashkuar, po lufton me ekstradimin e tij në SHBA për akuzat që lidhen me publikimin e mijëra dokumenteve sekrete në vitin 2010 dhe 2011.
Burimi: GAZETA.MK
