Latino-amerikanët janë grupi i dytë më i madh i votuesve në shtetin e Arizonës. Në zgjedhjet e 8 nëntorit, të rinjtë latino-amerikanë mund të jenë një forcë shtytëse për ndryshime në këtë shtet. Kamerat e Zërit të Amerikës ishin në qytetin Tucson, ku ndodhet dhe universiteti i Arizonës, për të marrë mendimin e disa votuesve dhe pritshmëritë që kanë ata në lidhje me zgjedhjet për Kongresin.
Disa studentë besojnë se pesha e votës së komunitetit latino-amerikan në Arizona do të jetë vendimtare e me ndikim në zgjedhjet për Kongresin.
“Nëse më shumë latino-amerikanë nxiten të votojnë, sigurisht që do të kemi ndikim”, thotë për Zërin e Amerikës Abigail Chavez, e cila voton për herë të parë.
Studenti Jesus Hinojosa po ashtu voton për herë të parë.
“Shumë nga pjesëtaret e familjes sime nuk votojnë dhe nuk duan të votojnë. Por unë besoj se mund të ketë ndryshim nëse votojnë latino-amerikanët”.
Shoqata Kombëtare e Zyrtarëve të Zgjedhur latino-amerikanë vlerëson se në Arizona më shumë se 664,000 anëtarë të këtij komuniteti do të votojnë në zgjedhjet e 8 nëntorit, duke shënuar një pikë kthese në pjesëmarrjen e këtij grupi në zgjedhje.
Sipas regjistrit zyrtar të popullsisë, mosha mesatare e latino-amerikanëve në Arizona është 27 vjeç, çka nënvizon fuqinë politike.
“Duhet të jetë shumë e rëndësishme që kandidatët dhe partitë politike t’u kushtojnë vëmendje shqetësimeve kryesore të latino-amerikanëve, veçanërisht të rinjve”.
Carolina Rodriguez-Greer është drejtoreshë e organizatës jofitimprurëse “Mi Familia Vota” “Familja ime voton”, për Arizonën. Gjatë fushatës së këtij viti organizata ka regjistruar 35 mijë votues të rinj.
Por cilat janë çështjet që po i nxisin të rinjtë të votojnë?
“Meqenëse familja ime është nga Meksika, problemet me të cilat përballen individët pa dokumente dhe ndihma ndaj tyre”, thotë për Zërin e Amerikës studentja Abigail Chavez.
“Për mua është ekonomia, sepse gjithçka është shtrenjtuar shumë”, thotë studenti Jesus Hinojosa.
Ines Reyes voton për herë të parë.
“E drejta që ka çdo njeri për të jetuar dhe çështja e abortit”.
Inflacioni, dhuna me armë dhe punësimi janë përparësitë kryesore mes votuesve latino-amerikanë në Arizona, sipas një sondazhi të fundit nga organizata UnidosUS.
“Ata janë të interesuar për problemet dhe duan të dinë se si politikanët do të ndihmojnë në përmirësimin e jetës së tyre. Ku dhe kur të votojnë për t’u siguruar që zëri i tyre të dëgjohet në këto zgjedhje”, thotë drejtuesja e organizatës “Mi Familia Vota” për Arizonën.
Latino-amerikanët janë grupi i dytë më i madh i votuesve në Arizona, dhe në përgjithësi, popullsia me rritjen më të shpejtë mes elektoratit amerikan./VOA
