Mbrëmjen e së enjtes (19:00) do të startojë kampanja evropiane e skuadrës belge Antwerp kundër FC Dritës nga Gjilani.
Trajneri i FC Antwerp, Mark van Bommel, kërkon fitore ndaj Dritës në ndeshjen e parë të rrethit të dytë kualifikues të Conference League.
“Unë e njoh tashmë Dritën, kjo është e sigurt.
Ne i kemi analizuar mirë ata. I kemi shikuar xhirimet dhe Drita është një skuadër shumë e mprehtë, që nëse i jepet hapësira mund të luajë futboll shumë të mirë.
Këtë e kemi parasysh, sikurse edhe pikat ku mund ta sulmojmë. Një shpjegim do të vijojë nesër para ndeshjes dhe pastaj në mbrëmje do të varet nga mënyra se si do ta bëjmë atë. Ambiciet i kemi të mëdha.
Kjo është qartë e dukshme, si në fushë ashtu edhe jashtë saj. Por, kjo nuk është një garanci që ne do të fitojmë papritur, por po punojmë shumë për të luajtur futbollin tonë më të mirë dhe për të rritur shanset për të fituar”, ka thënë van Bommel.
Në këtë sezon të dytë të Conference League, Antwerp është skuadra e parë belge që luan në Evropë.
