Politikani britanik Andy Burnham ka fituar bindshëm zgjedhjet e pjesshme parlamentare në zonën e Makerfield, duke siguruar një rikthim të rëndësishëm në Parlamentin britanik dhe duke u pozicionuar si një nga sfiduesit më të fortë të kryeministrit Keir Starmer për drejtimin e Labour Party.
Burnham, i cili ka shërbyer për vite me radhë si kryetar i bashkisë së Manchester, fitoi 55% të votave, duke lënë pas kandidatin e partisë Reform UK, Robert Kenyon, i cili mori 35%.
Zgjedhjet u konsideruan vendimtare për të ardhmen politike të Britanisë, pasi Burnham tashmë mund të kandidojë për drejtimin e Partisë Laburiste, gjë që nuk ishte e mundur pa qenë deputet në detyrë. Fitorja e tij vjen në një moment kur popullariteti i qeverisë së Starmer ka rënë ndjeshëm pas fitores së madhe në zgjedhjet e vitit 2024.
Pas shpalljes së rezultatit, Burnham deklaroi se vendi ndodhet në një moment kritik dhe se politika britanike ka nevojë për ndryshim.
“Të gjithë e dinë se politika nuk po funksionon. Sonte mund të jetë pika e kthesës për të ndërtuar një politikë të re të bazuar te uniteti dhe shpresa”, u shpreh ai para mbështetësve.
Fitorja e Burnhamit është parë si një sinjal paralajmërues për Starmerin, pasi shumë deputetë laburistë kanë shprehur pakënaqësi ndaj drejtimit aktual të partisë. Rikthimi i ish-ministrit në Westminster mund të hapë rrugën për një garë të brendshme për udhëheqjen e laburistëve në muajt e ardhshëm.
Gjatë fushatës, Burnham shmangu diskutimet e drejtpërdrejta për ambiciet e tij kombëtare dhe u përqendrua te problemet lokale të Makerfield, një zonë e prekur nga deindustrializimi, kriza e kostos së jetesës dhe shqetësimet për emigracionin.
Ndërkohë, rezultati konfirmoi gjithashtu rritjen e ndikimit të Reform UK, partia e drejtuar nga Nigel Farage, e cila vazhdon të fitojë terren në zonat tradicionale të Laburistëve.
Me hyrjen e Burnham në Parlament, politika britanike pritet të hyjë në një fazë të re tensioni, ndërsa shtohen spekulimet nëse ai do të sfidojë drejtpërdrejt Keir Starmerin për drejtimin e qeverisë dhe të Partisë Laburiste.
Burimi: botasot.info
