Një aksident i rëndë është regjistruar këtë të martë në aksin Berat-Dimal. Mësohet se aksidenti ka ndodhur në fshatin Moravë, ku si pasojë ka humbur jetën një 63-vjeçar. Aksidenti ndodhi rreth orës 10:15 ku një automjet është përplasur me biçikletën që drejtohej nga 63-vjeçari.
Si pasojë e përplasjes dhe plagëve të marra, ai ndërroi jetë në vendngjarje. Gjatë aksidentit është dëmtuar edhe një këmbësore. Ajo është transportuar në spital dhe ndodhet jashtë rrezikut për jetën. Policia ka nisur hetimet dhe po punon për zbardhjen e plotë të këtij aksidenti.
“Berat/Informacion paraprak Rreth orës 10:15, në aksin rrugor Berat–Dimal, në fshatin Moravë, shtetasi J. D., duke drejtuar automjetin, është përfshirë në një aksident rrugor me shtetasin K. S., 63 vjeç, i cili lëvizte me biçikletë. Si pasojë e aksidentit, shtetasi K. S. ka ndërruar jetë në vendngjarje.
Gjithashtu, gjatë përplasjes është dëmtuar edhe këmbësorja, shtetasja Dh. A., 63 vjeçe, e cila është transportuar në spital dhe ndodhet jashtë rrezikut për jetën.
Grupi hetimor ndodhet në vendngjarje dhe po kryen veprimet procedurale për sqarimin e rrethanave dhe përcaktimin e shkakut të aksidentit”, njofton policia.
Burimi: botasot.info
