Kryetari i Lidhjes Demokratike të Kosovës, Lumir Abdixhiku, e ka komentuar vendimin e Qeverisë Kurti për ta zbatuar vendimin e Gjykatës Kushtetuese të Kosovës të vitit 2016 për tokën e Manastirit të Deçanit. Ai ka thënë se populli i Kosovës është mashtruar nga Kurti dhe kauzat e tij të rrejshme.
Abdixhiku tha se vendimet e Kushtetueses janë të detyrueshme për zbatim dhe nuk mund të kontestohen.
Ai shtoi se ky “mashtrim dikur nxiste përplasje, përçarje e tension kombëtar”, që sipas tij e ka mbajtur peng fatin tonë euroatlantik.
“Vendimet dhe opinionet e Gjykatës Kushtetuese janë të detyrueshme për zbatim; ato nuk mund te kontestohen. Por ndërtimit të kauzave te rrejshme me qellim ardhjen ne pushtet, i thonë mashtrim!
Fatkeqësisht, populli i Kosovës ka qenë subjekt i mashtrimit popullist, perdja e te cilit ra – edhe nje here – lehtësisht. Ky mashtrim dikur nxiste përplasje, përçarje e tension kombëtar, duke mbajtur peng jo vetëm fatin tonë euroatlantik por dhe duke treguar papërgjegjësi nacionale.
Kauzat e rrejshme mbesin gjithnjë të dëmshme. Siç është e dëmshme dhe kjo qeverisje pa rezultate, pa parime, përplot propagande e mashtrim! Herët apo vone, qytetaret do ta kuptojnë se janë mashtruar ne çdo qëndrim! Le te përpiqemi sa me herët para se te behet vone”, ka thënë Abdixhiku.
