Rrëzimi i një aeroplani në Kazakistan me 38 viktima po shkakton spekulime për shkak të dëmeve të pazakonta në pjesën e jashtme të mjetit fluturues. Ndërkohë, Rusia paralajmëron kundër përfundimeve të nxituara për një rrëzim të mundshëm me qëllim.
Gjatë rrëzimit të një aeroplani të tipit Embraer 190, që i përkiste linjës ajrore të Azerbajxhanit Azerbaijan Airlines, pranë qytetit Aktau në bregun e Detit Kaspik, humbën jetën të mërkurën 38 persona, përfshirë tre anëtarë të ekuipazhit.
29 persona mbijetuan, disa prej tyre me plagë të rënda. “Pati disa shpërthime, nuk e di çfarë shpërtheu, dhe pastaj fluturuam për disa orë – derisa u rrëzuam,” tha një i mbijetuar pas aksidentit.
Një raketë shpërtheu pranë aeroplanit
Sipas raportimeve të Euronews, bazuar në burime qeveritare të Azerbajxhanit, rezultatet paraprake të hetimeve tregojnë se një raketë tokë-ajër ruse, e lëshuar nga sistemi mbrojtës Pantsir-S, shkaktoi rrëzimin e aeroplanit të Azerbaijan Airlines.
Sipas burimeve, raketa ishte lëshuar gjatë një fluturimi droni mbi Grozni dhe shpërthimi i saj në ajër afër aeroplanit kishte goditur pasagjerët dhe ekuipazhin në kabinë.
Burimet qeveritare raportojnë gjithashtu se aeroplani i dëmtuar nuk ishte lejuar të bënte një ulje emergjente në një aeroport rus, pavarësisht kërkesës së pilotëve, dhe ishte udhëzuar të fluturonte mbi Detin Kaspik drejt Aktau në Kazakistan. Gjatë përpjekjes për të bërë një ulje emergjente në Aktau, aeroplani u rrëzua. Sipas Euronews, sistemet GPS të navigimit të aeroplanit ishin të ndërprera gjatë gjithë fluturimit mbi det.
Kremlini paralajmëron përfundime të nxituara
Të enjten, zëdhënësi i Kremlinit, Dmitri Peskov, paralajmëroi kundër përfundimeve të nxituara. “Një hetim është duke u zhvilluar. Çdo incident në aviacion duhet të hetohet nga autoritetet e specializuara të aviacionit. Do të ishte e gabuar të nxirreshin hipoteza përpara se të dalin përfundimet e hetimit,” tha ai për agjencinë shtetërore ruse të lajmeve Tass.
Paqartësi rreth ndryshimit të itinerarit të fluturimit
Menjëherë pas rrëzimit, një zëdhënës i autoritetit rus të aviacionit civil raportoi se goditja nga një tufë zogjsh kishte shkaktuar një “situatë emergjente në bord”, çka e kishte detyruar pilotin të devijonte fluturimin drejt Aktau. Tre kilometra larg qytetit Aktau, ekuipazhi i aeroplanit tentoi një ulje emergjente, sipas njoftimeve të Azerbaijan Airlines.
Sipas linjës ajrore, aeroplani kishte kaluar një inspektim të plotë teknik në tetor të këtij viti dhe piloti kishte përvojë të madhe me mbi 15,000 orë fluturimi.
“Shpëto mamanë time, ajo është ende aty”
Ndërkohë, operacionet e shpëtimit dhe pastrimit në vendin e rrëzimit vazhdojnë. “Trupat janë në gjendje të keqe, shumica janë djegur, dhe të gjitha janë mbledhur,” tha zëvendëskryeministri i Kazakistanit, Qanat Bosymbajew, për CNN. “Tani po dërgohen në morg, ku do të kryhet identifikimi i tyre.”
Një grua që mori pjesë në operacionet e shpëtimit tregoi për shërbimin kazak të Radio Free Europe se kishte qenë dëshmitare e një skene rrëqethëse që e kishte prekur thellë.
“Pjesa e përparme e aeroplanit ishte në flakë. Ne shpëtuam të mbijetuarit. Trupat e tyre ishin të përgjakur. Ata qanin. Të gjithë kërkonin ndihmë,” tha ajo. Midis të mbijetuarve kishte njerëz të të gjitha moshave, përfshirë burra, gra, adoleshentë dhe një fëmijë të vogël. Vajza e vogël doli jashtë dhe i lutet gruas: “Shpëto mamanë time, ajo është ende aty brenda. Të lutem ndihmoje.”
Burimi: botasot.info
