Dy pilotë kanë humbur jetën pasi një aeroplan i vendosur për të ndihmuar në shuarjen e zjarreve në ishullin grek Evia është rrëzuar në qytetin bregdetar Karystos, raporton Anadolu.
Forcat Ajrore Greke thanë se piloti 34-vjeçar, Hristos Mulas dhe bashkë-piloti 27-vjeçar, Periklis Stefanidis, humbën jetën në aksident.
Aeroplani i tipit ‘Canadair’ u dërgua për të luftuar zjarrin në fshatin Platanistos.
“Një operacion kërkimi dhe shpëtimi është duke u zhvilluar. Një helikopter ‘Super Puma’ dhe një helikopter ‘AB-205’ i Forcave Ajrore janë nisur drejt zonës”, njoftuan më herët Forcat Ajrore Greke.
Në njoftim u theksua se aeroplani i tipit ‘CL-215’ me dy anëtarë të ekuipazhit u “rrëzua gjatë shuarjes së zjarrit ajror në Platanistos, Evia”.
Ministri i Mbrojtjes, Nikos Dendias, shpalli tre ditë zie për Forcat e Armatosura për humbjen e jetëve.
Evia është ishulli i dytë më i madh i Greqisë, që shtrihet në verilindje të Athinës.
Dhjetëra zjarre shkatërruese kanë përfshirë Greqinë prej ditësh, duke përfshirë ishullin Rodos, pikën e frekuentuar turistike.
Disa vende, duke përfshirë Türkiyen, kanë arritur të ndihmojnë Greqinë në shuarjen e flakëve, të cilat kanë djegur shtëpi dhe pyje.
