Мило ми е за донесената ослободителна пресуда, бидејќи доколку беше поинаку, за цела новинарска фела, а и за јавните функционери ќе имаше опасност да се воспостави една практика која што не оди во насока на демократијата и слободата на говор, вели новинарката Мери Јордановска, која беше дел од новинарите кои беа тужени од лидерот на „Левица“.
– Дел функционери можеби ќе си земаа право кривично да гонат новинари ако им се објави преписка со која навредуваат, на официјално побарана изјава, а кај новинарите ќе се создадеше страв да објавуваат и да бидат критички настроени кон оние што се платени од буџетски пари. Патем, знаеме колку стравот од кривични тужби може да доведе до самоцензура кај новинарите. Државните функционери мора да сфатат дека функцијата ја вршат 24/7 и се поподложни на јавна критика, без разлика дали одговораат на електронска пошта, смс порака, службен или приватен телефон. И кога ние како новинари ги бараме, ги бараме во име на јавноста, за работи кои се од јавен интерес, па оттаму не смее да се воспоставува практика на воведување страв и цензура – вели Јордановска.
Ослободителна пресуда за новинарите на А1.он во спорот со „Левица“
