Zyrtarët ushtarakë iranianë dhe të Arabisë Saudite u takuan në Rusi për herë të parë pas 7 vitesh, pas rivendosjes së marrëdhënieve midis Teheranit dhe Riadit, transmeton Anadolu.
Sipas agjencisë zyrtare të lajmeve të Iranit, IRNA, zv/shefi i Shtabit të Përgjithshëm iranian, gjeneral brigade Aziz Nasserzade dhe zv/ministri i mbrojtjes i Arabisë Saudite, Talal bin Abdullah al-Otaybi, u takuan në margjinat e Konferencës Ndërkombëtare të Sigurisë në Moskë.
Gjatë takimit u arrit marrëveshje mes dy palëve për të emëruar atashetë ushtarakë “sa më shpejt të jetë e mundur”.
Dy zyrtarët ushtarakë theksuan rëndësinë e rolit të forcave të armatosura të vendeve në zbutjen e marrëdhënieve midis Teheranit dhe Riadit dhe efektet pozitive nga kjo gjë për të dy vendet, rajonin dhe botën islame.
– Marrëdhëniet Iran-Arabia Saudite
Marrëdhëniet midis dy vendeve u ndërprenë pasi 47 persona, përfshirë klerikun shiit, Nimr al-Nimr, u ekzekutuan me akuza për “terrorizëm” në Arabinë Saudite më 2 janar 2016.
Më 10 mars, Irani dhe Arabia Saudite vendosën të normalizojnë marrëdhëniet pas një ndërprerjeje 7-vjeçare dhe ranë dakord të rihapin ambasadat e tyre, të rifillojnë fluturimet midis dy vendeve dhe të lehtësojnë vizat.
