Përderisa Gjermania po përballet me krizën energjetike në rritje, kompania ‘Aldi Nord’, një nga shitësit kryesorë të vendit, njoftoi se dyqanet e saj do të mbyllen më herët në mbrëmje, transmeton Anadolu Agency (AA).
Në rrjetet sociale kompania njoftoi se orari i punës së “dyqaneve të shumta” do të ndryshohet.
Nga nëntori, dyqanet do të mbyllen në orën 20:00 sipas orës lokale, ndërsa kjo masë do të zbatohet fillimisht gjatë periudhës së dimrit që vjen.
‘Aldi Nord’ nuk është e vetmja kompani në Gjermani që vendos kufizime në vazhdën e krizës energjetike.
Siç raportohet nga e përditshmja gjermane ‘Bild’, dyqanet e zinxhirit elektronik ‘Saturn’ dhe dyqanet e grupit ‘Galeria Karstadt Kaufhof’ tashmë kanë mbyllur shkallët lëvizëse të tyre.
Dy dyqane të kompanisë suedeze të mobiljeve ‘IKEA’ në shtetin jugperëndimor Saarland kanë shkurtuar gjithashtu orarin e tyre të punës.
Shitësi me pakicë ‘Otto Group’ u ka kërkuar shumë punonjësve të punojnë nga shtëpia, ndërsa zyrat në ndërtesat e tyre ngrohen në vetëm 15 gradë Celsius.
‘Volkswagen’, prodhuesi i dytë më i madh i automjeteve në botë, planifikon të ngrohë sallat e tij të prodhimit në vetëm 17 gradë Celsius, ndërsa punëtorëve në këmbim do t’u jepen veshje më të ngrohta.
Po ashtu edhe ‘Jungheinrich’, kompania e tretë më e madhe në botë e intra-logjistikës dhe inxhinierisë mekanike, planifikon të shpërndajë xhaketa leshi për punonjësit e saj.
Burimi: GAZETA.MK
