Zëvendëskryeministri i Parë dhe Ministri për Çështje Evropiane, Bekim Sali, mori pjesë në manifestimin qendror për shënimin e 25-vjetorit të Marrëveshjes së Ohrit, të organizuar në Çarshinë e Vjetër të Shkupit.
Sali theksoi se, 25 vjet pas nënshkrimit, Marrëveshja e Ohrit dëshmohet si shumë më tepër se një dokument politik, duke e cilësuar atë si një marrëveshje për bashkëjetesë, barazi dhe besim, e cila i dha vendit një drejtim të ri.
Ai theksoi se përvjetori duhet të shërbejë jo vetëm për të kujtuar të arriturat e deritanishme, por edhe për të reflektuar mbi përgjegjësinë për të ardhmen dhe ndërtimin e një Maqedonie të Veriut më të drejtë, më të zhvilluar dhe evropiane.
Sipas Saliut, qëllimi duhet të jetë një shoqëri ku çdo qytetar ndihet i barabartë dhe i respektuar, ndërsa 25 vjet pas Marrëveshjes së Ohrit, e ardhmja e vendit mbetet e përbashkët dhe përgjegjësia për ta ndërtuar atë është e të gjithëve.
Burimi: alfax.mk
