Presidenti ukrainas Volodymyr Zelensky vlerësoi sot se Ukraina, infrastruktura energjetike e së cilës u shkatërrua nga sulmet ruse, ka nevojë për “të paktën 800 milionë euro” ndihmë urgjente për të përmbushur nevojat e popullsisë gjatë dimrit.
Zelensky foli përmes videolidhjes në hapjen e konferencës ndërkombëtare të solidaritetit me Ukrainën, organizuar në Paris.
“Ne kemi nevojë për disa kategori pajisjesh, transformatorë, pajisje për restaurimin e rrjeteve të tensionit të lartë, turbina me gaz… Sistemi ynë energjetik ka nevojë, të paktën deri në fund të sezonit të ngrohjes, ndihmë urgjente nga sistemi energjetik evropian, d.m.th., energji elektrike nga vendet e Bashkimit Evropian në Ukrainë”, tha ai.
Presidenti ukrainas shtoi se kjo ndihmë “do të kushtojë rreth 800 milionë euro”.
Presidenti francez Emmanuel Macron theksoi sot vullnetin e komunitetit ndërkombëtar për të ndihmuar ukrainasit që të “rezistojnë gjatë këtij dimri” Rusisë.
Duke folur në hapjen e konferencës në Paris, Macron tha se “Rusia po përpiqet të mbjellë terror në popullatën e Ukrainës duke sulmuar infrastrukturën civile.
