Në javën e parë të muajit mars, në vend që të presim pranverën, do të kemi rikthimin e stinës së dimrit.
Në orët e para të mëngjesit zonat malore janë përfshirë nga reshje të pakta dëborë. Këtu në zonën e Dajtit trashësia e dëborës arrin nga 3-5 cm. Reshjet e dëborës në zonën e Tiranës janë gjithnjë të mirëpritur. Të rritur dhe fëmijë i gëzohen bardhësisë që të ofron natyra.
“Erdha këtu së bashku me familjen, po kënaqem pasi bëmë së bashku edhe një plak prej dëbore”, thotë një pushues.
“Erdha me vajzën për të shijuar borën. U kënaqëm pa masë”, thotë një tjetër.
“Unë e dua shumë borën, me të mund të luaj dhe të bëj babagjysh prej bore. Por qenka shumë i vështirë për tu bërë do ta provoj përsëri”, rrëfen një djalë.
E ndërsa bora do të vazhdojë të bjerë në male, në zonat e ulta qytetarët duhet të mbajnë çadrat me vete.
“Do të kemi një minidimër në javën e ardhshme. Dua të them që në zonat malore do të kemi përsëri reshje dëborë, por jo me këtë intensitet, do të jenë më ta pakta. Të martën dhe të mërkurën do të kemi reshje shiu. Ndërsa temperaturat do të ulen deri në 6 gradë celcius, që do të thotë se në zonat malore mund të shkoj edhe në -7 gradë celcius, ndërsa në zonën e ulta do të shkojnë nga 3-6 gradë celcius. Ky do të jetë moti I javës ditëve në vijim”, thotë Drinalda Shaholli nga MetoAlb.
