Presidenti i Kinës Xi Jinping do të marrë pjesë në samitin e 15-të të BRICS-it dhe do të bashkëkryesojë Dialogun e Liderëve Kinë-Afrikë në Afrikën e Jugut javën e ardhshme, njoftoi Pekini zyrtar, transmeton Anadolu.
Hua Chunying, zëdhënësja e Ministrisë së Jashtme kineze, tha në një deklaratë se Xi do të bëjë një vizitë shtetërore në Afrikën e Jugut nga e hëna deri të enjten.
Samiti do të mbahet në Johanesburg, ku presidenti i Afrikës së Jugut Cyril Ramaphosa do të presë homologun Xi, presidentin e Brazilit Luiz Inacio Lula da Silva dhe kryeministrin indian Narendra Modi nga 22 deri më 24 gusht.
Presidenti rus Vladimir Putin, i cili po përballet me një urdhër arresti ndërkombëtar me akuza për krime lufte në Ukrainë, nuk do të marrë pjesë në takim.
BRICS aktualisht përbëhet nga pesë vende – Brazili, Rusia, India, Kina dhe Afrika e Jugut – dhe zgjerimi i grupit pritet të jetë në agjendë.
Hua tha se Xi gjithashtu do të bashkëkryesojë me Ramaphosan Dialogun e Liderëve Kinë-Afrikë në kryeqytetin e Afrikës së Jugut. Ky do të jetë udhëtimi i dytë i presidentit Xi jashtë Kinës këtë vit, pasi ai bëri një vizitë shtetërore në Rusi në mars.
