Drejtori i Zyrës për Kosovën në Qeverinë e Serbisë, Petar Petkoviq, njoftoi sot se presidenti Aleksandar Vuçiq u ka bërë thirrje serbëve të Kosovës që të tërheqin barrikadat e vendosura në veri të vendit, raporton Anadolu Agency (AA).
Në një konferencë për shtyp, Petkoviq theksoi se kanë marrë garanci të forta nga SHBA-ja dhe BE-ja se nuk ka listë të arrestimeve dhe që nuk do të ndiqen serbët që janë në barrikada, si dhe ata që kanë marrë pjesë në barrikadat e mëparshme.
Petkoviq theksoi se KFOR-i garanton plotësisht që forcat e sigurisë së Kosovës nuk mund të hyjnë në veri të Kosovës pa pëlqim të dyfishtë – atë të komandantit të KFOR-it, por edhe lejen e katër kryetarëve të komunave të veriut të Kosovës ku serbët janë shumicë.
Ai tha se Vuçiq ua ka paraqitur përmbajtjen e këtyre dokumenteve serbëve të veriut të Kosovës dhe ka kërkuar që ata të tërhiqen nga barrikadat.
Petkoviq tha se serbët e veriut të Kosovës do të bisedojnë sonte me Vuçiqin dhe se më pas do të shihet se cili është vendimi i tyre.
“Në momentin kur ishim në prag të një konflikti të rëndë dhe gjakderdhjeje, më duket se arritëm ta ruajmë paqen. Po presim të dëgjojmë se cili do të jetë vendimi i serbëve të veriut të Kosovës”, tha Petkoviq.
