Kryeprokurori i Prokurorisë Themelore në Ferizaj, Burim Çerkini, ka mohuar se vrasja e rreshterit policor, Muhamed Lika në Kaçanik, ka ndodhur gjatë një tentim-grabitjeje.
Në konferencën për media, ai tha se vrasja e Likës mund të ketë qenë e planifikuar, megjithatë ende nuk dihet arsyeja e as motivi i kësaj vrasje të rëndë për të cilën të dyshuar janë dy persona.
“Të dyshuarit nuk kanë përdorur maska, por kapela. Ka qenë errësire dhe identifikimi bëhet më i vështirë. Nuk ka të bëjë me ndonjë pistë të grabitjes, nuk ekziston ndonjë pistë që të dyshuarit kanë pasur për qëllim grabitjen. Vërehet qartë që qëllimi i tyre ka qenë ekzekutimi i rreshterit”, tha Çerkini.
“Nga provat deri tani nuk kemi pistë që personat kanë pasur për qëllim të kryenin ndonjë grabitje, nuk mund të themi me saktësi që ka qenë e organizuar apo e paramenduar, por siç shihet përderisa kanë marr pjesë dy persona, mund të ketë qenë vrasje e planifikuar.
Ndërkohë, Ismet Rrahmani, prokurori i rastit, tha se viktima ka marr vetëm një goditje, dhe i njëjti nuk ka pasur antiplumb.
Rrahmani poashtu bëri të ditur se rasti ka ndodhur në shkallët e ndërtesës dhe nuk ka njohur se i ndjeri është përcjellë apo në qoftë se të dyshuarit e kanë pritur.
Burimi: botasot.info
