Prokuroria Themelore në Prizren ka kërkuar nga Gjykata Themelore në këtë komunë që të caktojë masë paraburgimi ndaj dy të dyshuarve, B.H. dhe I.H., lidhur me rastin e vrasjes së rëndë që ndodhi të hënën mbrëma në fshatin Zlipotok të Komunës së Dragashit, ku vdiq imami Gazmend Tahirovci.
Sipas kërkesës së Prokurorisë, B.H. dyshohet se më 29 qershor 2026, rreth orës 23, pas një mosmarrëveshjeje të mëhershme me viktimën G.T. për shfrytëzimin e një prone (livadhi), e ka sulmuar atë me një mjet të mprehtë (thikë), duke i shkaktuar lëndime fatale, si pasojë e të cilave viktima ka ndërruar jetë në vendin e ngjarjes.
Prokuroria bën të ditur në një kumtesë për medie, se B.H. dyshohet për kryerjen e veprës penale “Vrasja e rëndë”, sipas nenit 173 të Kodit Penal të Republikës së Kosovës.
Ndërkaq, I.H., babai i të dyshuarit kryesor, dyshohet se, ndonëse ka qenë në afërsi të vendit të ngjarjes dhe ka pasur mundësi të ofronte ndihmë pa rrezikuar veten apo të tjerët, nuk ka ndërmarrë veprimet e nevojshme për t’i ndihmuar viktimës. Ai dyshohet për veprën penale “Mosdhënia e ndihmës”, sipas nenit 188 të Kodit Penal.
Prokuroria Themelore në Prizren ka theksuar se mbetet e përkushtuar në luftimin e kriminalitetit, forcimin e sundimit të ligjit dhe sjelljen para drejtësisë të të gjithë personave që bien ndesh me ligjin.
Burimi: botasot.info
