Vizita e Presidentit Izraelit Isaac Herzog në Berlin u prit me protesta të hënën, ndërsa demonstruesit u mblodhën për të shprehur kundërshtimin e tyre ndaj fushatës ushtarake gjenocidale të Izraelit në Gaza.
Amnesty International organizoi një protestë në lagjen qeveritare për të protestuar kundër pritjes së nivelit të lartë që Presidenti gjerman Frank-Walter Steinmeier i bëri Herzogut, e cila përfshinte një pritje me qilim të kuq ndërsa konflikti në Gaza vazhdon, shkruan AA.
Protestuesit mbanin pankarta që shkruanin “Jepni fund gjenocidit të Izraelit në Gaza!”, “Jo armë për krime lufte në Gaza” dhe “Respektoni ligjin ndërkombëtar humanitar!”, ndërsa brohorisnin slogane që kërkonin t’i jepej fund fushatës ushtarake të Izraelit dhe shkeljeve të të drejtave të njeriut.
Sophie, një vullnetare e Amnesty që mori pjesë në protestë, kritikoi bllokadën e ndihmës humanitare të Izraelit për Gazën dhe krimet e vazhdueshme të luftës. “Kjo nuk është koha e duhur për një vizitë të tillë. Një partneritet i bazuar në vlera duhet të themelohet në parimet ligjore ndërkombëtare”, tha ajo për Anadolu, duke theksuar se Gjermania nuk mund ta shohë më Izraelin si një “partner vlerash”.
Vullnetarja u bëri thirrje politikanëve gjermanë të bëjnë presion mbi Izraelin për t’i dhënë fund bllokadës dhe për të lejuar ndihmën humanitare. “Ne gjithashtu kërkojmë ndërprerjen e furnizimeve me armë. Bashkëfajësia e Gjermanisë në një gjenocid të mundshëm është e papranueshme”, deklaroi ajo.
Herzog u prit nga Presidenti gjerman Steinmeier me nderime ushtarake në Pallatin Bellevue të hënën në mëngjes.
Vizita shënon 60-vjetorin e marrëdhënieve diplomatike midis Gjermanisë dhe Izraelit. Të martën, të dy presidentët do të udhëtojnë së bashku në Izrael, ku Steinmeier është planifikuar të takohet me Kryeministrin izraelit Benjamin Netanyahu dhe të zhvillojë diskutime me anëtarët e Knessetit.
Burimi: botasot.info
